Чъыбылты Иосыфы фырт Максим

Дзауы районы прокурор. Знауыры районы прокурор
27.01.1955 — 30.11.1964

Райгуырд 1913 азы 20 апрелы Хуссар Ирыстоны Ленингоры районы Ахалдабы хъӕуы.

Каст фӕци скъола, Фабричы-заводы училище, Тбилисы фӕндӕгты-топографион техникум ӕмӕ гуырдзыстоны ССР Тбилисы ӕфсӕддон-фистӕгӕфсӕддон училище. Каст Фӕци Харьковы Институты юридикон факультет.

Уый службæ кодта Советон æфсады рæнхъыты 1937-æм азæй 1946-æм азмæ.

Чъыбылты Иосыфы фырт Максим рацыд Фыдыбӕстӕйы Стыр хӕст йӕ райдайӕнӕй йӕ кӕронмӕ. Йӕ хӕстон фӕндаг райдыдта Финнаг хӕстӕй 1939 азы.1943 азы иттӕг хорз бӕрӕггӕнӕнтимӕ каст фӕцис танкты училище ӕмӕ йӕ снысан кодтой 48 гвардион ӕхсӕг дивизи 3 Белоруссийы фронты 53 хицӕн гвардион хӕддзӕугӕ артиллерион дивизионы 1 батарейы командирӕй. Ацыд тохтимӕ Цӕгат Кавказӕй фашистон Герман – Берлины гӕнахмӕ. Цыппар хатты фӕцӕф,дыууӕ хатты йын операци сарæзтой. Кӕй зӕгъын ӕй хъӕуы, хӕцӕны акъоппыты ӕнӕниздзинад фехӕлд, фӕлӕ Иосифы фырт Максим йӕ царды мидӕг уыд стыр фӕндоны хицау, алы хатт дӕр-иу госпиталӕй кӕнӕ медсанбатӕй рацӕугӕйӕ, ногӕй тагъд кодта рӕнхъмӕ-хӕцӕнмӕ.

Чъыбылты лаппуйы хæстытæй рацæугæйæ снысан кодтой батарейæйы партийы организаторæй.

Æфсæддон ранг – капитан.

Чъыбылты Иосыфы фырт Максимы ордентӕ ӕмӕ майдантӕм гӕсгӕ ахуыр кӕнӕн ис Фыдыбӕстӕйы Стыр хӕсты географи, алы хӕрзиуӕгмӕ гӕсгӕ дӕр – хӕстон уӕззау куыст, цӕфтӕ ӕмӕ туг: Фыдыбӕстӕйы хӕсты 1 къӕпхӕны орден, майдан "Германыл фӕуӕлахизы тыххӕй", Александр Невскийы орден, майдан "Берлины ахстæн ", майдан "Кенигсбергы ахстæн».

Советон ӕфсады рӕнхъытӕй демобилизацийы фӕстӕ 1946 азы январы Хуссар Ирыстонмӕ куы сыздӕхт, уӕд ракуырдтва Цхуырбаты Ольгӕ Иваны чызгы, медицинон хойы, схъомыл кодтой 3 сывӕллоны.

Чъыбылты Иосыфы фырт Максим куыста алыгъуызон бынæтты Хуссар Ирыстны автономон бæстуаты. 16.04.1946 азы нысангонд ӕрцыд Ленингоры районы прокуратурӕйы адӕмон фæдысгарæгæй, 24.12.1947 азӕй фӕстӕмӕ та – Знауыры районы прокуратурӕйы фæдысгарæгæй. 27.01.1955 азы нысангонд ӕрцыд Знауыры районы прокурорӕй. 2.04.1961 азӕй фӕстӕмӕ-Дзауы районы прокурор. 01.12.1964 азы нысангонд ӕрцыд Цхинвалы горӕты прокуроры ӕххуысгӕнӕгӕй 29.04.1966 онг, стӕй та 07.06.1966 азӕй фӕстӕмӕ – Цхинвалы горӕты прокуратурӕйы хистӕр фæдысгарæгæй (Цхинвалы ӕхсӕнрайонты прокуратурӕ рацарӕзт кӕй рцыд, уымæ гæсгæ). 22.07.1969 аз йæ сӕрмагонд курдиатмӕ гӕсгӕ уӕгъдгонд ӕрцыд, цы бынат ахста, уымӕй.

21.07.1954 аз бузныджы ныхас расидтысты ахуыры ӕнтыстдзинӕдты тыххӕй ӕмӕ ӕхсӕнадон куысты активонӕй архайгӕйӕ Советон цӕдисы прокуратурӕйы Харьковы курсыты бардзырдӕй, 05.12.1957 аз ГССР прокуроры бардзырдмӕ гӕсгӕ, куысты цы ӕнтыстдзинӕдтӕ бафтыд къухы, уыдоны тыххӕй арфӕйы ныхас фехъусын кодтой. 10.05.1961 аз хорзӕхджын ӕрцыд ГССР Сӕйраг Советы Президиумы кады грамотӕйӕ. 08.05.1965 аз хорзӕхджын ӕрцыд ГССР прокуратурӕйы Кады грамотӕйӕ. 04.11.1967 аз облӕсты прокурорӕй арфӕйы ныхас загъдӕуыд, йӕ службӕйы хӕс куыд фӕзминаг ӕххӕст кӕны, уый тыххӕй.

Амард Максим Иосифы фырт 29.12.1989 азы.