Паддзахадон зӕрдылдарӕн датӕты къӕлиндары ацы бон официалон ӕгъдауӕй фидаргонд ӕрцыд; 2020 азы 5 марты Республикӕ Хуссар Ирыстоны Президенты Указмӕ гӕсгӕ "Номарӕн бон сӕвӕрыны тыххӕй" ирӕтты геноциды амӕттӕгты ном сӕнусон кӕныны нысанӕн ӕвӕрд ӕрцыд зӕрдылдарӕн бон – 20 июнь – ирӕтты геноциды амӕттӕгты мысӕн бон. Уыцы датӕ баст у 1920 азы июны трагикон цаутимӕ, гуырдзыйы национ гварди Хуссар Ирыстонмӕ бырсын куы райдыдта хуссарирыстойнаг сыстад басӕттыны нысанимӕ, уӕд. Уый уыд ӕххӕст ӕфхӕрӕн операци, йӕ нысан – ирон адӕмы бынтон физикон ӕгъдауӕй фесафын.

920 азы 20 июны фехстой 13 ирон раздзоджы (зындгонд сты куыд «13 коммунары») — уый уыд символикон, ӕвдисӕйнаг ӕфхӕрд.

Гуырдзиаг ӕфхӕрджытӕ фехстой Уалыты Данелы, Уалыты Никъалайы, Цхуырбаты Кишлийы, Котолты Никъалайы, Джиоты Андрей, Ходы Пашкӕ, Гобозты Соскъо, Тедеты Иван, Цхуырбаты Тотр, Дзеранты Бутуйы, Гиголаты Резойы, Гигойы, Куымӕриттаты Гигойы.

Хуссар ирыстоны зӕхх арты пиллон уагъта. Сӕдӕгай хъӕутӕ ныххӕлӕттаг кодтой ӕмӕ сӕ басыгътой, сабыр цӕрӕг адӕмы – сылгоймӕгты, зӕрӕдты, сывӕллӕтты– ӕгъатырӕй куынӕг кодтой. Дӕсгай мин ралыгъдысты Хуссар Ирыстонӕй сӕ райгуырӕн хӕдзӕрттӕй.

XX ӕнусы райдианы Хуссар Ирыстоны геноциды амӕттӕгты мысӕн бон нӕ сӕртӕ ӕркъул кӕнӕм, мингай ӕнаххос адӕмы цард чи ахаста, уыцы трагедийы раз.

Хуссар Ирыл 1920 азы цы ӕвирхъау цаутӕ ӕртыхстысты, уыдонӕн скодтой ирон адӕмы геноцид ӕмӕ систы ирон адӕмы историйы тӕккӕ талынгдӕр сыфтӕй иу. Геноцид у канд бӕлвырд адӕмы ныхмӕ нӕ, фӕлӕ ӕппӕт дзыллӕйы ныхмӕ дӕр фыдракӕнд. Ӕппӕтадӕмон закъон бӕлвырд бӕрӕг кӕны геноцид, адӕймагдзинады ныхмӕ ӕппӕты уӕззаудӕр фыдракӕндтӕй иу, ӕмгъуыд кӕмӕн нӕй, ахӕм. Гуырдзиаг национализм историйы дӕргъы ӕвдыста йӕ адӕймагуарзон апп, куыд феодалон правленийы, афтӕ меньшевикты хицауады, кӕнӕ нырыккон псевдемократты дуджы. Йӕ апп ӕнӕивдӕй баззад-этникон сыгъдӕджытӕ ӕмӕ тыхмитӕ. Геноциды масштабы фыдракӕндтӕн уӕлдай ахсджиагдӕр у, цӕмӕй амӕттӕгты ном цӕра ӕнусты, трагедийы уроктӕ та уой фидӕны фӕлтӕртӕн фӕдзӕхсӕн.