Республикæ Хуссар Ирыстоны Генералон прокуратурæйы æмæ Хуссар Ирыстоны паддзахадон университеты æхсæн бадзырды фæлгæтты цæстдарды уагдоны рацыдысты практикæ уæлдæр ахуыргæнæндоны «Юриспруденци»-йы дæсныйады 3-аг къурсы студенттæ.

Дыууæ къуырийы дæргъы студенттæ зонгæ кодтой «Республикæ Хуссар Ирыстоны прокуратурæйы закъон»-ы бындуртимæ, процессуалон системæйимæ, уыдысты цауы бынаты. Прокуратурæйы кусджытæ сомбоны юристтæн ауагътой ахуыргæнæн мадзал фæдагурæн архайд – джигулы тыххæй.

Практикæйы фæлгæтты Хуссар Ирыстоны Генералон прокуратурæйы прокурортæ-криминалисттæ студенттæн ауагътой теоретикон мадзал лабораторийы, базонгæ сæ кодтой куыд хъæуы фæдтæ агурын, æртымбыл кæнын æмæ семæ дарддæры куыст. Афтæ ма сын уагъд æрцыд теоретикон мадзал моргы, цыран сæ лæмбынæг базонгæ кодтой сæ куысты сусæгдзинæдтимæ.

Ахуыргæнæндоны æмæ барадхъахъхъæнæг органты æхсæн бадзырдтæ фадат дæттынц, цæмæй цæттæгонд цæуой сомбоны квалификацигонд кусджытæ, æмæ сæ теоретикон зонындзинæдтæ æмæ практикæ æнгом баст æрцæуой. Практикæйы къухдариуæг у юстицийы хистæр уынаффæгæнæг, Генералон прокуроры хæдивæг Плиты Алан.

Уæ зæрдыл уын æрлæууын кæнæм, Хуссар Ирыстоны Генералон прокуратурæйы æмæ Хуссар Ирыстоны паддзахадон университеты æхсæн бадзырд кæй архайы 2019 азæй.