Республикӕ Хуссар Ирыстоны Генералон прокуратурӕйы уагъд æрцыд Генералон прокуроры ӕмбырд Генералон прокуроры хæдивджытимæ, горӕты ӕмӕ районты прокурортимæ. Ӕмбырды ныхас кодтой хъулон кӕсӕгтӕ (форель) ӕнӕзакъонӕй ахсыны фарстатыл ӕппӕт донуӕтты ӕмӕ цӕугӕдӕтты дӕр нересты рӕстӕджы. Ноджы ма ныхас цыд хъармгӕнӕн афоны хъӕды ӕнӕзакъон лыг кӕныны фарстайыл дӕр.

Собайты Григорий бахæс кодта горӕты ӕмӕ районты прокуратурӕты къухдариуæггæнджытæн, цӕмӕй паддзахадон хицаудзинады бынӕттон оргӕнты минӕвӕрттимӕ саразой ӕмбырдтӕ, цӕмӕй сӕ цӕст дарой хъӕд цӕгъдынмӕ, стӕй саразой ӕмбӕлон мадзӕлттӕ.

Уӕлдай хъусдард ӕрцыд хъӕд цӕгъдыны билеттӕ самал кӕнынмӕ. Генералон прокурор куыд фӕбӕрӕг кодта, афтӕмӕй ӕмбӕстӕгтӕй бирӕтӕ пайда кӕнынц иухаттон билетӕй цалдӕр хатты.

Хъулон кӕсаг ахсыны бар кӕй нӕй, уымӕ гӕсгӕ Генералон прокурор республикӕйы районты прокурортӕн бахӕс кодта, цӕмӕй сӕ цӕст дарой, цӕугӕдон ӕмӕ цады хъулон кӕсаг ахсыны бар ма уа ӕппӕт донуӕтты дӕр. Прокурортӕн хӕсгонд ӕрцыд ӕмбӕлон ӕххӕстбарджын оргӕнтимӕ иумӕ хъахъхъӕнын, цӕст дарын ӕмӕ фӕткыл кӕнын цӕрӕгойты дунейы объекттӕй пайда кӕныны ӕмӕ сӕ цӕрӕн бынӕттӕй пайда кӕныны къабазы, цӕмӕй саразой уӕлӕмхасӕн мадзӕлттӕ, кӕцытӕ нæ дæттынц бæлвырд æмгъуыдмæ кæсаг ахсыны бар. Прокурортӕн ма хӕсгонд у хæрæндæтты ӕмӕ кафеты хицӕуттимæ аныхас кæнын распискæйы бындурыл, цæмæй хъулон кæсаг ма исой. Кӕннод хæрæндæтты хицӕуттӕн административон бӕрндзинад ӕрдомдзысты.

Рейдон мадзӕлттӕ аразыны фӕстиуджыты ӕмӕ бӕрӕггонд уагхалӕнты тыххӕй хъусын кӕндзысты Генералон прокурорӕн алы къуыри дӕр; ӕххӕстгонд мадзӕлтты ӕмӕ бӕрӕггонд уагхалӕнты тыххӕй информаци мыхуыр цӕудзӕн Генералон прокуратурӕйы официалон сайтыл ӕмӕ социалон хызæгтыл.

Ӕмбырды ахсджиаг фарста 'сси лекцитӕ аразын, сӕ нысан - фыдракӕндты профилактикӕйы зонындзинӕдтӕ фӕбӕрзонддӕр кӕнын. Лекцитӕ араздзысты прокурортӕ ӕмӕ сæ æххуысгӕнджытӕ. Лекциты хатдзӕгтӕм гӕсгӕ пълангонд цӕуы Генералон прокуратурӕйы оргӕнты куыстмӕ эффективон практикӕтӕ бахӕссын.