Æнкъард хабар. 17 майы Хуссар Ирыстоны Знауыры районы прокурор ахицæн йæ цардæй.

Икъаты Юрий прокуратурӕйы органты куыста 2009 азæй фæстæмæ. 12 азы дæргъы уый къухдариуæг кодта Знауыры районы прокуратурӕйæн. Уыдис ын паддзахадон æмæ уагдонон хорзæхтæ.

Юриимæ ныхасгæнгæйæ, адæймаг алы хатт дæр банкъардтаид, куыд уæздан адæймаг уыдис Юрий, куыд сыгъдæгзæрдæ, æргомныхас лæг уыд- алцæмæй дæр æмæ алы хъуыддаджы дæр. Нæ зыдта йæхи иумæйаг хъуыддаджы аиуварс кæнын. Юрий Чермены фырты æнæрæстæджы мæлæт у тынг уæззау зиан æрмæст йæ бинонтæн æмæ хиуæттæн нæ, фæлæ йæ æмгусæгтæн дæр. Ахæм æмбал, ахæм æмгар дын уа, уымæй стырдæр амонд ма цы вæййы! Ахæмæй баззайдзæн йе 'мкусджыты, йæ зонгæты, йе ‘мбæлтты хъуыдыйы. Рухсаг у, Юрий!