Республикӕ Хуссар Ирыстоны Генералон прокуратурӕйы Фӕдагурӕн фӕткдаруат кæронмæ бакодта республикæйы дыууæ цæрæджы ныхмæ уголовон хъуыддаг. Уыдон аххосджынгонд цӕуынц адӕймаджы адавыны ӕмӕ исбон домыны хъуыддаджы.

Фӕдсгӕрсты бӕрӕггӕнӕнтӕм гӕсгӕ, цау ӕрцыд 2025 азы 6 сентябры. Рагагъоммӕйы бадзырдмӕ гӕсгӕ архайгӕйӕ, тыхмийӕ ӕмӕ хӕцӕнгарзæй пайдагæнгæйæ, аххосджынтӕ нӕлгоймаджы адавтой йӕ исбон сæхи бакӕныны охыл. Фыдгӕнджыты ныббырсты предмет сси фӕсарӕйнаг хӕдтулгӕ, йӕ аргъ уыд ӕппынкъаддӕр 4 700 000 сомы.

Фӕдсгӕрст куыд рабӕрӕг, афтӕмӕй фыдгӕнджытӕ скъӕфты фӕстӕ урӕдтой хъыгдард баййафӕджы Цхинвалы цӕгатварс. Дӕргъвӕтин рӕстӕджы фæстæ, физикон тых ӕмӕ ӕртхъирӕнтӕй пайда кӕнгӕйӕ, фыдгæнджытæ нӕлгоймагӕй домдтой, цӕмӕй сын радтаид транспортон фӕрӕз. Хæдтулгæйы дӕгъӕлтӕ сӕхи куы бакодтой, уӕд нæлгоймаджы аххосджынтӕ 8-ӕм июны уынджы йæхи хӕдзары раз рахизын кодтой. Фӕлӕ æфхæрдбаййафæг куы ссæрибар, уæд йӕхӕдӕг бахӕццӕ йӕ хӕдтулгӕйы лӕууӕн бынатмӕ. Цӕмӕй дзы ӕвзӕргӕнджытӕ ма спайда кӕной, уый тыххӕй нӕлгоймаг асаста фӕрсаг авг, бахызт салонмӕ ӕмӕ райхӕлдта моторы скусын кӕныны системӕйы электрон хӕйттӕ. Афтӕмӕй транспортон фӕрӕз давд не 'рцыд.

Хъуыддаджы фигурантты архайд квалификацигонд цæуынц Республикæ Хуссар Ирыстоны Генералон прокуратурӕйы рагагъоммӕйы фӕдсгӕрсты оргӕн Уголовон кодексы ахӕм уацтæм гӕсгӕ: · 126 уацы 2 хайы "а", "в", "г", "з" пункттæм гæсгæ (къорд адæймагæй адӕймаг адавын рагагъоммӕйы бадзырдмӕ гӕсгӕ хӕцӕнгарз ӕмӕ тыхмийӕ пайдагæнгæйæ); · 163 уацы 3 хайы "б" пунктмæ гæсгæ (исбон уӕлдай егъау бӕрцы райсыны охыл домын).

Ныртӕккӕ уголовон хъуыддаг фидаргонд аххосджынгӕнӕг уынаффӕимӕ ӕрвыст ӕрцыд тӕрхондонмӕ бӕстондӕр ӕркастмӕ. Азымджыныл куы банымайой, уӕд сӕм ӕнхъӕлмӕ кӕсы ӕфхӕрд суанг 15 азы онг ахӕстоны фӕбадын.