Районы администрацийы кусджытӕн ӕмӕ муниципалон кусджытӕн лекци ауагъта Дзауы районы прокурор Гӕззаты Георгий. Лекцийы нысан уыд барадон рухсад ӕмӕ закъон ӕмӕ барадон фӕтк фидар кӕнын.

Раныхасы рӕстӕджы бацагайдтой актуалон информаци ахсджиаг къабӕзты: бамбарын кодтой фӕллойадон закъонӕвӕрынады уагӕвӕрдтӕ, службӕйон дисциплинӕйы фарстытӕ, кусджыты бартӕ ӕххӕст кӕнын ӕмӕ фидаргонд гарантитӕ халын кӕй нӕ хъӕуы, уый.

Хъусдард ӕрцыд муниципалон службӕйы коррупцион фыдракӕндты профилактикӕйы мадзӕлттӕм, къуындӕгдзинӕдтӕ, барлӕвӕрдтӕ ӕмӕ домӕнтӕ ӕххӕст кӕнынмӕ интересты конфликт бауромыны тыххӕй, стӕй коррупцион ӕвдисӕнтӕ аразыны тыххӕй бӕрнондзинад ӕнӕфӕхицӕнгӕнгӕ кӕй у, уымӕ.

Гӕззаты Георгий йӕ лекцийы рӕстӕг коллективӕн фехъусын кодта информацион-телекоммуникацион технологитӕй пайда кӕнгӕйӕ финансон цӕстфӕлдахӕн миты нырыккон схемӕты тыххӕй, сӕрмагонд бӕрӕггӕнӕнтӕ ӕмӕ банчы хыгъдтӕ хъахъхъӕныны мадзӕлтты тыххӕй, стӕй адӕмы ӕхсӕн ӕмбарынгӕнӕн куыст кӕнын кӕй хъӕуы, уый тыххӕй.

Стыр ӕргом здӕхт ӕрцыд закъон ӕмӕ барадон фӕтк ӕххӕст кӕнынмӕ, ӕхсӕнадон бынӕтты хи дарыны ӕгъдӕуттӕм ӕмӕ активон æмбæстагон позици ӕвдисынмӕ.

Фембӕлды кӕрон Дзауы районы прокурор дзуапп радта, лекцимӕ хъусджытæм цы фарстытӕ æвзæрд, уыдонӕн.