Милицӕйы кусджыты барадон ахуырдзинад фӕбӕрзонддӕр кӕныны охыл Дзауы районы прокуроры хӕстӕ ӕххӕстгӕнӕг Гӕззаты Георгийӕн лекци арӕзт ӕрцыд Дзауы районы милицӕйы уголовон агуырды хайады оперативон ӕххӕстбарджынтӕн.

Лекци арӕзт уыд районы территорийыл барадон уагӕвӕрд сифтонг кӕныны ӕмӕ прокуратурӕйы оргӕнтимӕ ӕмархайды хицӕндзинӕдтыл ӕрныхас кӕнынмӕ.

Лекцийы рӕстӕг Гӕззаты Георгий бахахх кодта, зӕгъгӕ, уголовон агуырд у милицӕйы сӕйраг дӕлхайад, кӕцы архайы уголовон фыдракӕндтӕ раргом кӕныныл ӕмӕ сӕ баиргъӕвыныл. Уголовон агуырды кусджытӕ ӕрвылбон ӕмбӕлынц фыдракӕндтӕ иртасыныл, фыдгӕнджыты бӕлвырд кӕныныл ӕмӕ фыдракӕнды архайдӕй хъыгдард баййафӕг адӕмы интерестӕ хъахъхъӕныныл.

Уӕлдай ӕргом здӕхт ӕрцыд уыцы фактормӕ, ӕмӕ уголовон агуырды оперативон куыст у фыдракӕндтӕн тагъд дзуапп дӕттын, сӕ сӕххӕст кӕныны уавӕртӕ раргом кӕнын ӕмӕ аххосджынты ӕрцахсын. Уый домы канд профессионалон арӕхстдзинад нӕ, фӕлӕ ма рӕстӕг ӕмӕ информаци фаг кӕм нӕй, ахӕм уавӕрты тагъд уынаффӕтӕ кӕнын дӕр.

Дзауы районы милицӕйы уголовон агуырды кусджытимӕ иумӕ ма ныхас цыд оперативон-агуырды куысты къӕпхӕнтыл-фыдракӕнды тыххӕй информаци райсыныл, оперативон-агуырды мадзӕлттӕ аразыныл, фыдракӕнд раргом кӕныныл ӕмӕ гуырысхойаджы ӕрцахсыныл, прокуратурӕмӕ ӕрмӕджытӕ раттыныл.

Гӕззаты Георгий йӕ хъус дардта, уголовон агуырды кусджыты архайд кӕддӕриддӕр закъоны аккаг кӕй хъуамӕ уа, хидарыны уаг та — фӕзминаг ӕндӕр милицӕйы кусджытӕн ӕмӕ республикӕйы ӕмбӕстӕгтӕн.

Уголовон агуырды куыст, фыдракӕндтӕ раргом кӕнынимӕ баст, домы канд профессионализмы ӕмӕ оперативондзинады бӕрзонд ӕмвӕзад нӕ, фӕлӕ ма иудадзыг ӕмархайд кӕнын иннӕ барадхъахъхъӕнӕг структурӕтимӕ, уӕлдайдӕр та прокуратурӕимӕ. Уголовон агуырды кусджыты профессионализмы фӕрцы къухы бафты вазыгджын фыдракӕндтӕ раргом кӕнын, аххосджынты дзуапдӕттӕг скӕнын ӕмӕ ӕфхӕрд адӕмы бартӕ хъахъхъӕнын.