Цхинвалы прокурор Джиоты Эдвард ауагъта ахуырадон рабадт Республикæ Хуссар Ирыстоны Мидхъуыддæгты министрады Фæдагурæн фæткдаруаты фæдагурджытæн «Азымгæнæн гæххæтт саразыны фæдыл».

«Абон мах равзардзыстӕм æрмæст УПК-йы 220 статьяйы теори нæ, кӕцыйы сымах афтӕ дӕр хъуамӕ зонат, фӕлӕ ацы документ ӕмбырд кӕныны практикон психологи ӕмӕ тактикӕ, цӕмӕй 237-ӕм уацмӕ гӕсгӕ хъуыддӕгтӕ фӕстӕмӕ раздахыны тӕссагдзинӕдтӕ фӕкъаддӕр уой», - загъта прокурор.

Джиоты Эдвард куыд фӕнысан кодта, афтӕмӕй бирӕ фæдагурджытæн азымгæнæн хатдзӕг бацӕттӕ кӕнын, гӕнӕн ис ӕмӕ фӕкӕса хуымӕтӕг процедурӕмӕ, фӕлӕ растдæр уыцы документ свӕййы барадхъахъхъӕнджыты куысты «рӕстдзинады уысм». «Фæдагурӕг канд юрист ӕмӕ тактик нӕу, уый цыдӕр хуызы зæгъæн ис, драматург ӕмӕ архитектор у, – бахахх кодта прокурор. - Сымах аразут егъау куыст: дӕсгай фарстатӕ, æрфарстытæ, ӕнӕхуыссӕг ӕхсӕвтӕ басгæрстыты рæстæджы, бирæ экспертон анализтæ. Фӕлӕ æппæт уыдæттæ сты æрмæстдæр арæзтадон æрмæг. Азымгæнæн хатдзӕг у уӕ уголовон хъуыддаджы разуынд ӕмӕ æххуысгæнæг фæлгæттæ хӕссӕг. Кæд ацы фæлгæтты йӕ мидӕг ис иу чысыл æнæфæразгæдзинад – процедурон рæдыд кæнæ логикон ӕнӕрастдзинад, æнæбастдзинад – уæд уæ фӕдсгӕрсты агъуыст иууылдӕр тӕрхондоны ныккӕлдзӕн».

Прокурор лæмбынæг æркаст азымгæнæн гæххæтт саразыны домæнтæм æмæ Уæрæсейы Уголовон-процессуалон кодексы 237-æм статьямæ гæсгæ уголовон хъуыддæгтæ тæрхондонмæ раздахынмæ цы рæдыдтытæ æркæнынц арæхдæр, уыдонмæ.

Джиоты Эдвард банысан кодта, зæгъгæ, тӕрхонгӕнӕг ӕмӕ прокурор алы хатт нæ ахуыр кæндзысты се 'ппӕт хъуыддæгтæ ахæм хъусдардæй, куыд, фæдагурӕг. Фӕдсгӕрсты хӕрзхъӕддзинады тыххӕй фыццаг ӕмӕ ахсджиагдӕр тæлмæнтæ райсынц азымгæнæн гæххæттæй.

Ахуыры рӕстӕг ӕркастысты сӕйраг практикон аспекттӕм:

• фыдракӕнды архайды конкретон ӕмӕ логикон афыст ӕнӕмӕнг кӕй хъӕуы, уый;

• аххосджыны удгоймаджы ӕмӕ йӕ тӕрхондӕтты тыххӕй бӕрӕггӕнӕнтӕ бӕлвырд документаци кӕнын;

• квалификацион миниуджытӕ ӕмӕ ӕмархайджыты рольтӕ раст раргом кӕнын;

• ӕвдисӕйнӕгты дӕсны раныхас ӕнӕ уӕлдай æнæ æнæхъуаджы лыстæгдзинæдтæй;

• хъахъхъӕнынады позицийы æнæмæнгхъæуæг анализ;

• техникон домæнтæ азымгæнæн гæххæттмæ ӕрмӕджыты ӕмхасӕны бафтауыны тыххæй;

• типикон рæдыдтытæ, кæцытæ æркæнынц тæрхондоны æрдыгæй хъуыддæгтæ фæстæмæ раздахынмæ.

Ахуыры сӕйраг хайы фӕстӕ фæдагуржытӕ зӕрдиагӕй бавнӕлдтой ныхасмӕ. Архайджытӕ дих кодтой вазыгджын ӕмӕ быцӕуаг ситуацитӕ сӕхи практикӕйӕ, дӕнцӕгтӕ хастой реалон уголовон хъуыддӕгтӕй, бӕлвырд кодтой ӕвдисӕйнӕгтӕ аразыны ӕмӕ фыдракӕнды фабулӕйы формулӕты бацӕуӕнтӕ. Ныхас рауад цардӕгас ӕмӕ мидисджын, прокуроры амындтытӕ та фидаргонд цыдысты бӕлвырд дӕнцӕгтӕ ӕмӕ практикон цауты ӕвзӕрстытӕй.

Ахуыры кӕронмӕ Джиоты Эдвард скодта хатдзæгтæ:

«Азымгæнæн у æппæт æмбырдгонд æрмæджытæн кæронбæттæн, квалификацион аргълæвæрд, цы ӕрмӕджытӕ ӕрӕмбырд кодтой, уыдонӕн се' ппӕтӕн дӕр кӕронбӕттӕн дӕсны аргъгонд. Бæлвырдгæнæн бындуры цыбырдзинад ӕмӕ ӕххӕстдзинады æхсæн баланс сифтонг кæны документы процессуалон стабилондзинад тæрхондоны.

Мӕ зӕрдӕ уын зӕгъы къаддӕр «фæстæмæздæхтытæ» æмæ фидардæр, бындурæвæрд тæрхæттæ».

Ахуыр сси пайдайаг фӕзуат Республикӕ Хуссар Ирыстоны Мидхъуыддæгты министрады Фæдагурæн фæткдаруаты фæдагурджытæн фӕлтӕрддзинад ӕмӕ профессионалон дӕсныйад фӕбӕрзонддӕр кӕнынӕн.